"வட்டுக்கோட்டை தீர்மானம் 40 " வரலாற்று சிறப்பு மிக்க ஆண்டில் பேர்லின் நகரில் தமிழ்க் கல்விக் கழகத்தின் தமிழாலய பொங்கல் விழா மிகவும் சிறப்பாக நடைபெற்றது . தமிழர் திருநாள் அரங்க நிகழ்வுகள் ஆரம்பிக்கும் முன்னர் தமிழ் மக்களின் இருப்புக்காக தம்முயிரை தியாகம் செய்த உன்னத செல்வங்களுக்கு ஈகச்சுடர் ஏற்றி மலர் மாலை அணிவித்து அகவணக்கம் செய்யப்பட்டது . புலம்பெயர்ந்து வாழ்ந்தாலும் தமிழின அடையாளத்தையும் , தமிழ் மொழியையும் ,தமிழர் பண்பாட்டையும் , கலை கலாசாரத்தையும் அழிந்து விடாமல் பாதுகாக்கும் வகையில் தமிழர் திருநாள் மிகவும் சிறப்பாக தமிழ் கல்விக் கழகத்தின் வழிநடத்தலில் பேர்லின் தமிழாலய நிர்வாகத்தின் ஒழுங்கமைப்பில் ,. தமிழாலய மாணவர்களின் ஆற்றலில் அமைந்திருந்தது.

ஆரம்ப நிகழ்வாக மண்டபத்தின் வெளித்திடலில் பொங்கலிடல் முதியவர்களின் முன்மாதிரியான செயற்பாட்டில் மிகவும் சிறப்பாக இடம்பெற்றது . தொடர்ந்து அரங்க நிகழ்வுகள் , மண்டபம் நிறைந்த மக்களுடன் , மனம் நிகழ்ந்த பெற்றோர்களுடன் தொடர்ந்தது .

பாலர் நிலை குஞ்சுகள் தொடக்கம் மேல் நிலை மாணவர்களின் அனைத்து அரங்க கலை நிகழ்வுகளும் மக்களை ஈர்க்கும் வண்ணம் அமைந்திருந்தது . நன்றி செலுத்தும் திருநாளில், பேர்லின் தமிழாலயம் வளர்ச்சிக்கு ஆரம்ப காலம் தொட்டு இன்று வரை உழைத்தவர்களுக்கும் , மற்றும் பேர்லின் தமிழ்ச் சமூகத்துக்கும் , தமிழ் மொழிக்கும் பாடுபடும் உறவுகளுக்கும் மதிப்பளிப்பு நடைபெற்றது .

பேர்லின் தமிழாலய பொங்கல் விழாவுக்கு பிரதம விருந்தினராக வருகை தந்து உரையாற்றிய பேராசிரியர் டக்மார் ராஜநாயகம் , தனது உரையில் தமிழ் மொழியின் தொன்மையையும் , புலம்பெயர் மண்ணில் தமிழ்ச் சிறார்கள் தமது தாய் மொழியை கற்பது மட்டும் அல்லாது அதை பேணிக்காப்பதின் அவசியத்தையும் உணர்த்தி இருந்தார் .

இத் திருநாளில் தமிழ்க் கல்விக் கழகத்தின் பேர்லின் தமிழாலயத்தில் கல்வி பெற்று 2013/2014 ஆண்டு 12 ம் வகுப்பை சிறப்பாக முடித்த மாணவர்களுக்கு வடமாநில ரீதியாக நடைபெற்ற மதிப்பளிப்பின் நிழற்படங்கள் அடங்கிய தொகுப்பை அரங்கத்தில் திரையில் காண்பிக்கப்பட்டது . அதேபோல் தமிழ்க் கல்விக் கழகத்தால் நடாத்தப்பட்ட தமிழ்ப் பட்டயக் கற்கைத் தேர்வில் தேர்ச்சி பெற்றவர்களுக்கான மதிப்பளிப்பின் நிகழ்வின் காட்சியை மீள்நினைவுபடுத்தும் வகையில் இங்கும் அவர்களுக்கான நிகழ்வு அமைந்திருந்தது .

இறுதியில் பேரன் பேர்த்தி கண்ட பேர்லின் தமிழாலயத்தின் அதன் பெருமையை கொண்டவர்களுக்கு சிறப்பு மதிப்பளிப்பு நடைபெற்று , பேர்லின் தமிழாலய வளர்ச்சிக்கு வலுச்சேர்க்கும் முகமாக புதிய இணையத்தளமும் அறிமுகம் செய்யப்பட்டு , தமிழர் திருநாள் 2016 இனிதே நிறைவுகண்டது.