இத்தாலி பலேர்மோ மாநகரில் 24/01/2016 ஞாயிறு மாலை 4:00 மணியளவில் தைப்பொங்கல் சிறப்பு நிகழ்வு ஆரம்பமாகியது. ஆரம்ப நிகழ்வாக மண்டபத்திற்கு வெளியே மிகச் சிறப்பாக தமிழ்க்கலாச்சார முறைப்படி தைப்பொங்கல் இடம்பெற்றது. பின்னர் மண்டபத்தில் அரங்க நிகழ்வுகள் தமிழீழ தேசியக்கொடியே ற்றலோடு அருட்தந்தை மற்றும் ஆலய பூசகர்கள்,தமிழ்த் தேசிய கட்டமைப்பின் பிரதிநிதிகள்,தமிழ்ச்சோலை,கலைப்பள்ளி பொறுப்பாசிரியர்கள் மங்கள விளக்கை ஏற்றிவைக்க நிகழ்வுகள் ஆரம்பமாகியது. பாடல்கள்,நடனங்கள்,கவிதைகள் சிறப்புரைகள் என்பன இடம்பெற்றன .இந்நிகழ்வில் பெருந்திரளான மக்கள் கலந்து சிறப்பித்தார்கள்.

இந்நிகழ்வில் கலை பண்பாட்டுக்கழகப் பொறுப்பாளர் உரையாற்றும் போது,எங்கள் இனத்தின் உயிர்ப்பும்,இருப்பும் மொழி கலை கலாசாரத்தில் தங்கியுள்ளது என்றும்,எமது கலை கலாச்சாரத்தை பேணிப்பாதுகாக்க வேண்டிய அவசியத்தின் தேவையையும் வலியுறுத்தினார். தொடர்ந்து இளையோர் அமைப்பின் பொறுப்பாளரும்,இத்தாலி ஈழத்தமிழர் மக்களவையின் பிரதிநிதியுமான திரு.ஸ்டேபனோ அவர்கள் உரையாற்றும்போது,வட்டுக்கோட்டைத் தீர்மானத்தின் 40வது ஆண்டின் மீள் எழுச்சியுடன் கூடிய தமீழீழத் தனியரசை நோக்கி மக்கள் அனைவரும் எழுச்சி கொண்டு அணிதிரள வேண்டும் என்ற அவசியத்தையும் வலியுறுத்தினார். இறுதியில் தேசியக்கொடி இறக்கப்பட்டு,நம்புங்கள் தமிழீழம் பாடலோடு நிகழ்வுகள் இனிதே நிறைவுற்றது.